MANERA
MANERA S’ellu ci fussi manera Di riguarrà un vagliinu D’acqua fresca è palatinu Per annacquà una terra Chi sgrinia sott’à lu sole Carca di rabbia è di fole S’ellu ci fussi manera Di scalcinà un rampale Accimatu da u male Per sguaglià a cattivera Chi campa sott’à mil’arie Ricca di danni è miserie Manera à manera S’alza una spera Di voce sincera S’ellu ci fussi manera D’accurtà issi passi ingordi Di silenzi è di ricordi Per attempà a visera Chi voga sempre à pasponi Ricca di prumissioni S’ellu ci fussi manera D’alluntanà a ragione Di rimbeccu è di passione Per viutanne a cherchera Di tutte l’idee fatte Chi crescenu ciatte ciatte Manera à manera S’alza una spera Di voce sincera (Petru Santucci)