Memoria ( puesia di Patriziu Croce)

MEMORIA

Hè u pesu di l’ore, u pesu d’ogni cosa

Chì ci porta à falà, à staccà, à strappà

Ma chì vi spiana fora, tutta la vita ascosa

È da suvu à sbuccià, arricchisce è po dà

Sò i chjassi smariti chì sorgenu dinò

Al di là di u locu, al di là di u tempu

Sò e fonte ardite chì piglianu inghjò

Trascinendusi l’anni, e risate è i pienti

È u soffiu tremendu inde e borghe biote

Ughjulendusi l’ira, scaccanendu di vita

Cù e voci in lu ventu, i suspiri di notte

È u trattu chì spira : una parlata erghita

Sò e cose à falà, chì si portanu quì

E stampe, e vistiche, u fume d’ogni gloria

È ciò chì nùn fù dettu, da rinnuvassi, sì

Tramandendu à chì cresce, un fiatu di memoria

In Bastia d’aprile 2006 : Patriziu Croce

(album Dì u mare : Stéphane Casalta / Patrizia Gattaceca)

Blog de Stéphane Casalta